Ég á ekki til eitt einasta aukatekið orð!

Af einstakri forvitni kveikti ég á sjónvarpinu, nánar tiltekið skjá einum til þess eins að rétt kíkja á Herra Ísland áður en ég héldi áfram að læra.

Ég er búin að spyrja sjálfa mig að því núna þessar 15 mínútur sem ég horfði á sjónvarpið... "hver í ósköpunum er að gera okkur þetta?" þá meina ég já okkur íslensku þjóðinni, þetta er náttúrulega hreinlega til háborinnar skammar.

Ekki nóg með það að stráklingarnir séu augljóslega svo ungir og óreyndir að eistun þeirra eru sennilega nýgengin niður þá er allt göngulag og það sem á að heita "modelling" ekki til í þessari útsendingu. Þetta er augljóslega óæft með öllu, ekki bara strákagreyin heldur kynnarnir líka sem lesa brandarana beint upp af blaði, enda eru þetta innlits-útlits greyin sem eru svo sem bara vön því að geta klippt og eytt þegar þeim líkar ekki við eitthvað. Ég tek það fram að keppnin var löngu byrjuð þegar ég kveikti, þegar ég kveikti þá sagði karlkynskynnirinn "mikið er gott að strákarnir eru að ná sér á strik í framkomunni" ég bara spyr... hvað gekk þá eiginlega á áður en ég kveikti????

það er ótrúlegt að þessari keppni sé ennþá haldið til streitu. Augljóslega fást ekki strákar til að taka þátt, því allir þeir sem hafa efni og tilburði til að vera Herra Ísland eru klárlega ekki þarna, heldur bara einhverjir unglingar! Svo er reyndar einn sem er 25 eða 26 ára held ég, vorkenni honum pínu, ég held að honum finnist þetta vera jafn pínlegt og mér.

Regína Ósk er með skemmtiatriðin þarna, hún er svo sem ágæt greyið, en afhverju er hún þarna?

Það er skemmst frá því að segja að ég er búin að slökkva á sjónvarpinu, ojoj og æjæj vona að skipuleggjendur keppninnar sjái að sér og hætti þessum kjánaskap.

ég er annars heima að föndra og dúlla mér, og svo auðvitað að klára lokaverkefnið í ferðamálafræði. Mikið verður nú gott þegar það verður búið...