... said what the hell're we doing drinkin' in LA...

Svo virðist sem ég eigi mér tvífara! Tvífari minn er nákvæmlega eins og ég að öllu leyti, nema það að hún er einstaklega illgjörn og andstyggileg, hagar sér ósæmilega á almannafæri og reynir að telja fólki trú um að hún sé ég. Vill ég biðja alla þá sem verða á vegi hennar að hugsa sig tvisvar um áður en þeir trúa henni til að vera ég. Um helgina fór þessi stúlka (ég held að hún heiti Hexia Satanía) niður í miðbæ Reykjavíkur og viðhafði þar óforbetranlega hegðan að öllu leyti. Með henni í för var vinkona hennar (að nafni Lúsíferína De Vil) Ekki er hún skárri því hún er einkar ósvífin og tálkvendi með meiru.
Ég er hér búin að sitja sveitt við og reyna að leiðrétta þennan misskilning sem þær vinkonur komu í gang um helgina. Ég er búin að þurfa að biðja eigendur allra helstu skemmtistaða borgarinnar að fjarlægja myndir af sora og viðurstyggð sem þær vinkonur stóðu fyrir. Þið sjáið að auðvitað gætu svoleiðis myndir komið sér illa fyrir mig þar sem allmargir gætu villst á mér og illa innrætta tvífara mínum.
Ég hef þó lýst eftir henni við Lögreglustjóraembættið í Reykjavík og bið alla þá sem kunna að hafa upplýsingar um farir Hexiu og Lúsiferínu að hafa samband við lögregluna hið snarasta.
tútilú
-Eva